:: Sebedau Nurun Ngayau ::

Sebedau nurun ngayau,diak meh bala sida ti deka enggau ngayau betesau ngagai bala bukai ti semak serta bala ti rapat enggau sida madah ka 'Tuai Kayau' deka mai begempuru ba ruai rumah ia sebedau sida bekejang nurun ngayau..

Maya begempuru ba ruai tuai rumah diak meh sida deka meri penemu agi pangan diri serta berunding ka chara deka nyerang munsoh..Udah sida tembu begempuru,diak sida mesti deka ngaga 'Perau Kayau' dikena niti jalai sungai nuju endor munsoh..Sida mega deka nyedia ka perengka kena ngayau baka 'duku ilang' enggau 'terabai'..Terabai ti digaga mesti kering enggau lempung ngambi ka nyamai dibai bejalai maya nyerang munsoh..Sida mega deka begaga ka sumpit dikena nyerang munsoh ari endur ti jauh serta enda ulih didinga..Sumpit ti digaga sida mesti bebekal ka 'Laja' ti udah diansah enggau tajam serta besalut ka bisa ural tauka besalut getah kayu ipoh..

Tembu aja sida nyedia ka utai ti deka kena ngayau,diak sida deka begempuru sekali da agi dikena netap ka ari ti ngam nurun ngayau enggau tungga endor ngayau..Seminggu sebedau sida nurun ngayau,diak bila sida ti kindu ba rumah panjai nya udah nyedia ka perengka dikena ngangau ka Petara..

Bala sida ti lelaki deka nurun ngasu enggau nubai ikan ba sungai ti semak ngambi ka cukup bekal pemakai bala anak bini sida ti tinggal ba rumah panjai sepemanjai ari sida beperang..Sida mega deka minta serta begiga ka pengaroh ari bala ti semak tauka bala kaban belayan sida ngambi ka sida kering maya beperang..

Seari sebedau bala sida nurun ngayau,sida deka manduk beras pulut ke bekal sida sepemanjai ari sida ngayau..Malam sebedau ngayau,bala ti enggau ngayau bekumpul ba ruai bilik 'Tuai Kayau' laban ti deka Miring ka pengaroh enggau minta tulung Petara..

Maya pengawa miring deka bejalai,diak meh 'Tuai Kayau' ti dibantu bala 'Manang' deka milih bala lelaki ti olih enggau ngayau laban nyema lelaki nya enda dipilih Petara,ia deka mati tauka bulih pemedis maya ngelaban bala munsoh..'Tuai Kayau' mega deka milih lelaki ti olih nyadi ketua nyaga rumah panjai enggau nyaga bala anak bini sida sepemanjai ari sida nurun ngayau laban sida mega takut enggai ka rumah panjai sida diserang munsoh maya sida nadai..

Sepengudah pengawa nyedia ka tujuh pinggai piring tembu,Tuai Kayau deka milih siko lelaki maca jampi agi 7 iti piring nya sambil ngayun ka manok tuai ba atas piring..Manok ti udah dikena bebiau ba piring nya tadi deka dibiau 3 kali ba atas pala bala ti dipilih enggau ngayau diiring leka sampi..'Tuai Kayau' lalu muai ai tuak ti disalin ba gelas tujuh kali ngambi ka Petara semampai nyaga sida serta ngelari ka segala penusah ari sida..

Reti perengka piring : 

Asi pulut : ngambi ka semua bala ti enggau pengawa ngayau nya besatu ati serta betulung pangan diri ngambi ka ulih ngalah ka semua munsoh..

Reti sida ngirup tuak : ngambi ka semua bala ti enggau ngayau nya kering serta enda takut ka munsoh maya benung beperang..

Reti miring ngena 'Tumpe' : nunjuk ka betapa setia bala sida ngagai Tuai Kayau..

Reti nabur rendai : ngarap ka Petara ari menua Panggau Libau nurun nulung sida ngalah ka munsoh..

Insap daun enggau perengka piring ti bukai deka disimpan ba dalam 'Keresang' lalu di taruh ba tiang tangga rumah sida..