Berita Iban

28/5/2013

Siko Lelaki Dipelaba Parai Ditagup Baya

MIRI: Seiku lelaki umur 26 taun dikenangi parai ditagup baya benung iya bira ba tebing sungai Karap, Bakong kena malam Hari Enam tu tadi.

Penusah tu dipechaya nyadi urung pukul 10.00 malam nya.

Operasyen begiga sereta nyelamat dipejalaika kenyau ari pagi Hari Minggu udah riput polis digaga di Balai Polis Bakong.

Niang, Irwanshah bin Ra­din, Melanau ari Mukah, gawa ba kompeni batang urung dua bulan ke udah ba kandang endur Bakong.

Nunda penerang ari bakih sepengawa enggau Irwanshah sida tedingaka rauh pinta saup iya dua kali sebedau tengelam ke dalam ai dipechaya ditarik jelu ai ke dalam ai.

“Kami berumban ngesah tudah udah ke tedingaka rauh nyawa iya …tang enda memu­kai kami semina meda riak ai aja…” ku seiku bakih iya.

Kuarters ke alai sida iya diau nya urung 50 meter ari tebing ai. Naka berita tu ditulis, polis bedau udah nemu bangkai iya.

The Borneo Post dipadahka menijer kem batang kala me­san bala pengereja dia enda semak sungai nya laban ke mayuh baya.

Pengerami Gawai Patut Bisi Ngenahka Penganan

SARATOK: Pengerami Hari Gawai ke diintu raban bansa Iban enda tau enda bisi mantaika kuih bansa asal kelebih agi penganan.

Taja pia, ukai ukai se­mua orang nemu ngaga penganan nya laban enda bisi resipi kediri empu sereta begunaka penge­landik lebuh ngaga tepung nguring sereta ngelepika penganan nya.

Kelimpah ari nya, pen­ganan ke digaga bansa Iban nya disediaka nengah chara ke nyelai kelai mandangka pengelandik sida ngaga penganan nya.

Tepung beras ke di­engkah ba tachu ke udah digaga lubang, diikat ba kayu panjai ti nyadika pemegai. Kayu nya tadi lalu digitang enggau tali ke panjai mantu ngemudahka pengawa natok sereta ngur­ing penganan nya.

Seiku peranak menua ditu kedikelala enggau nama peranak asal menua, Dawell, 52, madahka pen­gawa ngaga penganan tu be­gunaka pengeliat ati enggau chara ngaga ke manah.

“Dalam adat bansa Iban, penganan nya mega kelai gaga ati sepengudah tembu bumai ke nyadi batang pengidup bansa Iban.

Ari kelia menya, resepi dikena ngaga penganan nya ngena gula apong, tepung beras, ai enggau santan.

“Enti semua perengka nya udah dichampur, nya baru tepung nya tadi diiri ngagai tachu ke udah digaga lubang sereta diguring ,” ku iya madah ngagai pen­garang berita ensanus.

Lebuh ke nguring, enti penganan nya udah be­bali kuning, nya baru sida nanggung iya ari kali sereta dilepi empat segi.

Bansa Iban ke ngemeran­ka pengawa bumai, teulihka runding ngaga penganan ari tepung beras.

Beras kelimpah ari diem­pa, mega digaga nyadi tepung beras dikena ngaga mayuh macham bansa kue nyengkaum penganan

Read more: http://www.theborneopost.com/2013/05/28/pengerami-gawai-patut-bisi-ngenahka-penganan/#ixzz2Uasg9prZ

26/5/2013

SIBU: Raban bansa Dayak kelebih agi Iban maya rebak diatu bisi bendar dipeda ngiarka adat enggau main asal maya ngintu Hari Gawai Dayak.

Kunsilor Opis Pelilih Menua Pesisir Sibu (MDLBS) Pasang Ngelambai madah, raban bansa Iban diatu suah agi ngatur pekit baka ‘poco-poco’, Pekit Kumang Kebaya, karaoke enggau ke bukai maya ke nyambut Hari Gawai di rumah panjai.

“Semua utai nya ukai adat enggau main asal raban bansa Iban. Ketegal ubah jeman ke diatu nya daya idup sereta pesaka bansa baka ngajat, betabuh, nyumpit, main asal Iban baka Bebatak Lampung, Bepatis enggau mayuh ke bukai nya majak dibuai ke tisi.

“Peranak rumah panjai udah enda nurunka daya idup enggau pesaka bansa asal Iban di rumah panjai maya rebak diatu. Tebal agi nya udah bebalut enggau daya idup menua luar dataika rebak diatu mayuh bendar peranak Iban enda ngelala main asal enggau pesaka bansa diri,” ku iya.

Iya bejaku munyi nya ba pengerami Makai Malam Mantar – Gawai Komiti Pemansang enggau Pengelikun Kampung (JKKK) Permai Jaya, Sibu ke diatur di sebuah hotel tebilang ditu, malam kemari.

Pasang diambi nyadi Tuai Pengabang ba pengerami nya ngarika Chairman MDLBS James Laju Ambok.

Sama bisi datai Chairman JKKK Permai Jaya Lipa Maing, Chairman Gerempung Tuai Rumah Sibu Kunsilor Linus Melin, penyanding penemu Sarawak Dayak National Union (SDNU) Sibu Jaya Dr Ali Puji enggau chairman pengatur Ramli Man.

Pengerami nya digulu urung 300 iku orang ari peranak dia ke diperindang dua iku artis diundang iya nya Bolbo Kamat enggau Riena Will.

“Sambut Hari Gawai ngena adat asal, pesaka bansa enggau main asal ngambika Hari Gawai diintu baka asal suba. Anang neju daya idup luar tama maya nyambut Hari Gawai di rumah panjai.

“Belajarka adat daya idup enggau pesaka bansa kitai dulu sebedau ngangkatka seni daya idup luar,” pia ku semetak jaku iya.

Berebak enggau nya, Pasang madahka tebal agi nembiak rebak diatu enda nemu ngajat pia mega orang tuai laban kurang sedar bekaul pekara tu.

Ba pengujung pengerami nya, Pasang bisi mega nyuaka insentif pelajar ari Tabung Pelajar JKKK Permai Jaya ngagai Veronica Yeen Chumpin ke bulih pemutus nyulut dalam peresa Ujian Penilaian Sekolah Rendah (UPSR) taun nyin tadi.

Pengerami Manta-Gawai nya mega dirichah enggau pekit ngirup ai tuak, kumang kebaya, nyeradak ai pengayu enggau ngetas Ranyai.

Read more: http://www.theborneopost.com/2013/05/26/kemeranka-adat-main-asal-iban-maya-nyambut-gawai/#ixzz2USUKJmoJ